Manusha taro beshipasko than Crvena zvezda phravdje o drom ko Nish
NIŠ – Rroma kola beshena ko beshipasko than Crvena zvezda phravdje avdive ko ekvasho dive o drom Dushan Popovich palal so, sebepi so achavdje oljenge e struja, ikerdje ki blokada jek dive.
Sulejman Sulejmanovich taro akava beshipasko than phendja kaj phravdje o drom thaj irabdjepe ko ple khera sebepi so nashti beshena ko shil.
„ Struja naje amen, a na djana ni kana ka ovol amen. Ko nakhle duj chon naje udara kola na phradjam, taro dive kana achiljam bizi struja, thaj ridindjam azhutipe, numa khoni na dindjamen azhutipe“, phendja o Sulejmanovich.
Sar phenol tano akava beshipasko than kote isi 100 khera, naje olen struja sebepi taro borchi kova tano 30 milionija dinarija.
„ Rodindjam taro EPS snabdevanje te o borchi pokina ko rate, numa ni odova na magena. Na mengen te den amen ni kontrolne strujomerija basho s ao khera“, phenol o Sulejmanovich.
Ov phendja tano kaj akava rromano beshipasko than Crvena zvezda ukljuchimo po duj strujomerija, a o manusha pokinena paushal po duj milje dinarija.
„ Na sijam basho odova te na pokinol pe e struja, numa rodaja te pokina odoborom kobor hardjina“, phendja o Sulejmanovich. Zenko Osmanovich taro akava beshipasko than phenol kaj shaj te ovol humanitarno katastrofa ano akava beshipasko than.
„ Isi amen shel ćhave thaj but nasvale manusha ko beshipasko than. Naje amen shaipe basho djivdipe, numa o ćhave te djan ki sikavni“, phendja o Osmanovich.
Ov phenol kaj isi but chorore rromane familije kola djivdinena taro odova so keden gunoj. Ano lil kova o EPS snabdevanje bichaldja ko besipasko than Crvena zvezda phenola pe kaj reprogram taro borchi bashi struja nashti ovol.
„Pokinipe bashi hardjimi struja kerol shaipe te kerol normalno buti o sistemi taro EPS. Ako naje saja kozom valjani shaj te ovol dji odova te na ovol shaipe te dol pe struja basho sa o manusha tari Republika srbija“, phenela pe ko lil taro EPS
The post Manusha taro beshipasko than Crvena zvezda phravdje o drom ko Nish appeared first on Romaworld.
Source: Romski
Share :
