Ko rubo tari egzistencija
“Duj parija basho shel dinarija, duj parija basho shel dinarija, panda avdive sijam ko tumaro foro, tah ko aver”. Adjahar pochmini “bucharni dive” 36-bershenge Sasha Bakich taro Nish.
“Ake bikinava charape te shaj achovav djivdo jevende da nilaje da, so te kerav, mora. O chave roden, najema kobor valjani basho djivdipe”!
Adjahar startuina o vakeribe e Sashaja jek taro 10 milje manusha kola tane socijalnol ugrozime, thaj lena socijalno azhutipe ko thajra.
Centro basho socijalno buti “Sveti Sava” ko Nishi basho sa ple korisnikija dola hakaj ko jekhe chonesko azhuipe, te kinen pe kashra, a o Rroma sar sa avera isi olen shukar informacije taro plo hakaj thaj pherena olen, phenol e manushni soj ko than taro sherutno ki akaja institucija Javorka Ranđelovich.
“ Dikhen me, mli rromni thaj trin chave isi amen 16200 dinarija, ko svako chon. Odova hari, da li te has, te uravape numa te pokina e struja? But phare, najema thajra ni kashta te kinav, a but shil. Isima panda jek metrp kash, o jeven tek pochmini, penol o Sasha. Dji akana kobor bersh lav materijalno nikad na liljam taro Centro kashta!
Phenipa taro te den pe thajra te kinen pe kashta puchola pe taro lokalno budžeti. Akale bersheste na sine thajra basho akava azhutipe, phenela sherutni taro Centro basho socijalnol buti.
Naje thajra basho kash, naje buti basho 36-bershengo Sasha thaj basho panda 29 milje nishke Rroma. Sar thaj taro so te djivdinol pe, kana I rashtra naje ola briga kobor valjani premalo ple manusha. Kana jek familija naje taro so te djivdini, naje ola sikljovipe te ovol konkurentno ko trzhishte tari buti, na gndinol sar valjani numa djala odori kaj isiola te halt e pijol.
Taro sa o gendo taro manusha so lena socijalno azhutipa svako pandjshto rodola buti. Saja tari rashtra lena 264.350 manusha, olendar 44.686 prijavimo ko biro. Mashkaro korisnikija taro socijalno azhutipa ki Srbija, premalo nesavo phenipa, svako dujto sposobno bashi buti. Akava azhutipa, sar phendje amenge ko MInistreumi tari buti, khuviba ki buti thaj socijalno politika, lena 104.662 familije, numa 264.350 manusha. Mashkaro olende aktivnol buti rodena 44.686 manusha numa svako pabdjshto. Osnovica basho pokinipe taro socijalno azhutipa tani 7.530 dinarija. Shukar tano o gendo taro okola kola na mangena te arakhen buti, odoleske so ka zaradinen buchaja ka ovol hari po buderi tari socijala. Socijalno ugrizime familije lena chavorengo dodatko da, kova tano 2.535 dinarija (bajrardo 3.295), e rachunica sikavi kaj pashe se jek djivdinene akola so kerena buti thaj okola so na kerena buti.
“Oven saste, shukat charape liljen, celo jeven ka phiraven olen”, magipaja hasala o Sasha, odozhe uzaro tvrdjavsko pazari ko -3 stepenijako shil. Shaj avdive ka kerol 500 dinarija thaj ka ovol ole so te hal ple familijaja.
The post Ko rubo tari egzistencija appeared first on Romaworld.
Source: Romski
Share :
